Sunday, May 18, 2014

ഓടി കളിക്കുവാനെത്തുന്നു ....

എന്നെ എപ്പോഴും വിസ്മയിപ്പിക്കുന്നത് നിന്‍റെ ആ യാത്രകള്‍ ആണ്, ഇന്നലെകളുടെ മൂടല്‍മഞ്ഞും തേടി, ഗതാകാലത്തിന്‍റെ പുതപ്പ് വാരിച്ചുറ്റി, ഓര്‍മ്മകളുടെ താഴ്വരയിലേക്കുള്ള നിന്‍റെ യാത്രകള്‍. ആ നേരങ്ങളില്‍ നീ എത്ര സൗന്ദര്യവതിയാണ് എന്ന് അറിയാമോ, എനിക്കപ്പോള്‍ നിന്‍റെ ആത്മാവില്‍ അലയടിക്കുന്ന അനന്തമായ സന്തോഷത്തിന്‍റെ പ്രതിബിംബം ആ വിടര്‍ന്ന കണ്ണുകളില്‍ കാണാന്‍ സാധിക്കും.

അപ്പോള്‍ ഞാന്‍ എന്‍റെ സ്വപ്നങ്ങളെ മറക്കും, സ്വപ്‌നങ്ങള്‍ നാളെയുടെതാണല്ലോ, ഓര്‍മ്മകള്‍ ഇന്നലെകളും. നിന്‍റെ ഇന്നലെകളെ കുറിച്ച് നീ വാതോരാതെ സംസാരിക്കുമ്പോള്‍ എന്‍റെ നാളെകള്‍ ആ ഓര്‍മ്മകളിലേക്ക് മടങ്ങിപോകുന്നതിനെ കുറിച്ച് ചിന്തിക്കും.

അതെ, ഇന്നലെകളുടെ ഓര്‍മ്മകളുടെയും നാളെകളുടെ സ്വപ്നങ്ങളുടെയും ഇടയില്‍ ഇന്നത്തെ ചിന്തകള്‍. എന്തിനു നമുക്കത്, ഇനി നമുക്ക് നിന്‍റെ ഇന്നലെകളെ കുറിച്ച് മാത്രം സംസാരിക്കാം, അവിടേക്ക് കൈകോര്‍ത്ത് ഇറങ്ങി ചെല്ലാം.

വരൂ പ്രിയേ .. നമുക്ക് വീണ്ടുമൊരു യാത്ര പോകാം, ഓര്‍മ്മകളുടെ താഴ്വരയിലേക്ക്. ഗതകാലസ്മരണകള്‍ ഉറഞ്ഞുറങ്ങുന്ന ആത്മാവിനെ തൊട്ടുണര്‍ത്താന്‍. ഓര്‍മ്മകളെ സ്വപ്നം കണ്ടുറങ്ങാന്‍ ...

No comments:

Post a Comment